د پنځمې ناحیې اړوند د قمبر څلورلارې له بلاکونو څخه تر چهل متره سړک پورې د قرغې سړک د جوړولو او پراختیا چارې چې، څه موده وړاندې د کابل ښاروالۍ له لوري پیل شوې وې، تر دې مهاله ۲۰ سلنه مخته تللې دي. د کابل ښاروالۍ د برنامو او پروژو د تنظیم ریاست د معلوماتو پر بنسټ؛ دغه سړک چې (۵۵۸) متره اوږدوالی او (۴۶) متره سور لري، د لښتیو، پلو لارو، ګلدانونو او د یوه معیاري سړک د نورو برخو په ګډون به تر راتلونکو څلورو میاشتو پورې جوړ او ګټې اخیستنې وسپارل شي. د دې سړک په جوړېدو سره به د سیمې د اوسېدونکو یو شمېر ستونزې هوارې او ترانسپورتي آسانتیاوو ته به لاس رسی ومومي. غوښته کیږي چې، د سیمې اوسېدونکي د یاد سړک ساتنې ته پام وکړي ترڅو یې له ژر ویجاړېدو څخه مخنیوی وشي