ښاریانو ته د ترانسپورتي او ټولنیزو آسانتیاوو رامنځته کولو په موخه، د شپږمې ناحیې اړوند د ۲۱م او ۲۴م ګذر په نوآباد بهادرخان او عباس قولي سیمو کې د کوڅو جوړولو دوه پروژې بشپړې او د شپږمې ناحیې د رئیس مولوي عبدالخالق بدر، د کابل ښاروالۍ د برنامو او پروژو د تنظیم ریاست د غیر اختیاري پروژو د څارنې د آمر انجنیر ذبیح الله رحیمي او د سیمې یو شمېرمشرانو له لوري ګټې اخیستنې ته وسپارل شوې. د شپږمې ناحیې رئیس د یادو کوڅو په جوړېدو خوښي وښوده او ویې ویل: د دغو کوڅو په جوړېدو سره به د سیمې د اوسېدونکو ځني ستونزې هوارې او ټولنیزو او ښاري آسانتیاوو ته به لاس رسی ومومي. نوموړي دیادو سیمو له اوسېدونکو غوښتنه وکړه چې، د نویو جوړو شویو کوڅو ساتنې ته پام وکړي. ورته مهال انجنیر ذبیح الله رحیمي د دغو پروژو په هکله وویل: په ۲۱م ګذر کې کوڅه (۱۰۲۳) متره اوږدوالی او له (۳ څخه تر۳.۵) مترو پورې سور، او په ۲۴م ګذر کې کوڅه (۹۱۳) متره اوږدوالی او له (۳ څخه تر۴) مترو پورې سور لري چې د لښتیو په ګډون د (۱۳.۲) میلیونه افغانیو په لګښت د کابل ښاروالۍ له خوا او د ملګرو ملتونو د پروژوي خدمتونو د دفتر په مرسته د (۴) میاشتو په موده کې بشپړې شوې. د یادونې وړ ده چې، په یادو پروژو کې (۴۰۰) تنو هېوادوالو ته د کار زمینه هم برابره شوې وه