ښاریانو ته د ترانسپورټي او ټولنیزو آسانتیاوو رامنځته کولو او د سیمو د اقتصادي ودې په موخه، د نهمې ناحیې اړوند د هوایي ډګر له څلورلارې څخه د کابل – جلال آباد سړک په اوږدو کې تر ګمرک سیمې پورې د نوي سړک د جوړلو چارې چې، څه موده وړاندې د کابل ښاروالۍ له خوا پیل شوې وې، تر اوسه (۱۴) سلنه مخته تللې دي او ټاکل شوې ده د یوه کاري کال په بهیر کې به بشپړې شي. د کابل ښاروالۍ دبرنامو او پروژو د تنظیم ریاست د معلوماتو پر بنسټ؛ دغه سړک په دوه اصلي او دوه فرعي لیکو کې د (۲۷۹۴) مترو په اوږدوالي او (۶۰) مترو په سور سره جوړېږي چې، د (۱۴۵۰) مترو په اوږدوالي، له (۲ څخه تر۲.۵) مترو پورې سور او د (۱.۶۰) مترو په ژوروالي سره د یوه کانال او د (۴۲ او ۵۰) مترو په اوږدوالي او له (۱) څخه تر (۳) مترو پورې په سور سره د (۳) کوچینو پلونو جوړول هم په دې پروژه کې شامل دي. په همدې توګه د یاد سړک دواړو خواوو ته پلې لارې، د سړک د منځ ګلدانونه، د بایسکل چلولو لیکې، تم ځایونه او د یوه معیاري سړک نور جزئیات هم د دې پروژې بله برخه ده، چې د جوړېدو چارې یې په چټکۍ سره روانې دي