د استملاکي ملکیتونو او نورو خنډونو تر پاکولو وروسته، د دیارلسمې ناحیې اړوند له امید سبز ښارګوټي څخه تر عرفاني سړک (برچي سیمې) او پر دوام یې د قلعه قاضي تر سړک پورې د دوو مهمو سړکونو د جوړولو چارې پیل شوې. د کابل ښاروالۍ د برنامو او پروژو د تنظیم ریاست د معلوماتو پر بنسټ؛ ټاکل شوې ده د امید سبز ښارګوټي له اصلي سړک څخه تر عرفاني سړک پورې د (۳۸۳۴) مترو په اوږدوالي او (۴۵) مترو په سور، او پر دوام یې د حلقوي سړک تر اوږدو یا قلعه قاضي سیمې پورې د (۱۱۴۶) مترو په اوږدوالي او د (۲۰) مترو په سور سره سړک، تر راتلونکو (۱۵) میاشتو پورې په اساسي توګه جوړ شي.اوس مهال د یادو سړکونو د کیندنو، خاورې لېږدولو او هوارولو چارې روانې دي، چې په جوړېدو سره به یې د کابل د لوېدیځي برخې اقتصادي ودې او د ښار معیاري پراختیا ته زمینه برابره شي