د کابل ښاروالۍ د کار، ساتنې او مراقبت ریاست له لوري له تهیه مسکن څلورلارې څخه تر سرای شمالي پورې د سړک د فرعي لیکو جوړولو چارې روانې دي او ټاکل شوې ده د روان کال په بهیر کې بشپړې او ګټې اخیستنې ته وسپارل شي. د کار، ساتنې او مراقبت ریاست د پلونو او سړکونو آمر انجنیر محمد داؤد ځواب په دې اړه وویل: دغه فرعي سړکونه دواړو خواوو ته (۹۰۰) متره اوږدوالی او (۱۴.۵) متره سور لري چې، (۶.۴) متره یې د موټرو د تګ راتګ، او پاتې نوره برخه یې پلو لارو، ګلدانونو، د پلو لارو دهلیزونو، د بایسکل چلولو لیکو او ترافیکي نښو ته ځانګړې شوې ده. نوموړي زیاته کړه چې، اوس مهال د سړک د یوې خوا فرعي لیکې د خاورینې برخې، او د بلې خوا د استملاکي ملکیتونو د پاکولو چارې روانې دي ترڅو د سړک جوړولو ته زمینه برابره شي. دېادو فرعي سړکونو په جوړېدو سره به په سرای شمالي او ورڅېرمه سیمو کې ترافیکي ستونزې هوارې او د سیمو د اقتصادي ودې سربېره به ښاریانو ته ټولنیزې او ښاري آسانتیاوې هم رامنځته شي