د اوولسمې ناحیې اړوند د خیرخانې کوتل سړک د دویمې برخې د جوړولو او پراختیا چارې، د کوتل له سر څخه د مزار تر هډې پورې د (۲۵۲۰) مترو په اوږدوالي او د (۶۰) مترو سور سره په چټکۍ روانې دي. د کابل ښاروالۍ د برنامو او پروژو د تنظیم ریاست د مسئولینو په وینا؛ هڅه کیږي چې، د سړک جوړولو د دې مهمې پروژې چارې د روان کال په بهیر کې بشپړې او ورسره جوخت به د سیمې په ګڼه ګوڼه کې د پام وړ کمښت رامنځته شي. دغه سړک د لښتیو، پلولارو، د بايسکل چلولو لیکو، ګلدانونو او تم ځایونو، په سړک د کرښو اچولو، د ترافيکي نښو نصبولو او د یوه معیاري سړک د نورو برخو په ګډون جوړېږي. د دغه سړک د جوړولو چارو له بیلابیلو پړاوونو څخه فني او تخنیکي څارنې ترسره کیږي ترڅو له یوې خوا د کار کیفیت تضمین او له بلې خوا پروژه په ټاکلي وخت بشپړه شي. د خیرخانې کوتل سړک د جوړولو او پراختیا چارې، د کابل ښار د تلپاتې ودې او پراختیا، او د ترانسپورتي آسانتیاوو رامنځته کولو په برخه کې ځانګړی ارزښت لري. کابل ښاروالۍ په دې وروستیو کې توانېدلې ده چې، د دې سړک د لومړۍ برخې چارې په معیاري توګه بشپړې کړي او یوازې د څراغونو د نصبولو چارې یې پاتې دي. د یاد سړک د دویمې برخې د جوړولو سربېره، د درېیمې برخې د تدارکاتي چارو په اړه هم اقدام شوی چې، په نږدې راتلونکې کې به یې عملاً چارې پیل او د دې لویې ترانزیتي لارې ترافیکي او ترانسپورټي ستونزې به حل شي