کابل ښاروال مولوي عبدالرشید د خیرخانې کوتل سړک د دویمې برخې، له لب جر څخه تر سرای شمالي، له هنګرها څلورلارې څخه تر قصبې، د هوايي ډګر له څلورلارې څخه د ګمرک تر سیمې، د مکروریانو له څلولارې څخه تر تنګي غارو، له امید سبز ښارګوټي څخه تر عرفاني سړک او پر دوام یې تر قلعه قاضي او له ذاکرین ښارګوټي څخه د قرغې تر سړک پورې د نویو جوړېدونکو سړکونو له کاري پرمختګ څخه لیدنه وکړه او پر مسئولانو یې ټینګار وکړ چې، په کار کې غفلت او د کیفیت نشتون د کابل ښاروالۍ مشرتابه او ښاریانو ته د منلو وړ نه دي او د سړک جوړونې پروژې باید د ډیزاین او تخنیکي سندونو له مخې په ټاکلي شوي وخت، په لوړ کیفیت او معیاري توګه ترسره شي. نوموړي قراردادي شرکتونو ته سپارښتنه وکړه چې، د کار د چټکوالي او ښاریانو ته د آسانتیاوو رامنځته کولو په موخه دې د سړکونو جوړولو پروژو چارې د شپې مهال هم تنظیم شي او د سړکونو په اوږدو کې دې د ګڼه ګوڼې د کمښت لپاره بدیلې لارې چارې ولټوی. دغه راز کابل ښاروال اړوند مسئولینو ته سپارښتنه وکړه چې له هرې ممکنې لارې دې هڅه وشي ترڅو د سړک جوړونې یو شمېر پروژې د ژمي تر رارسېدو وړاندې بشپړې او د ترافیکو پرمخ دې پرانیستل شي. د یادونې وړ ده چې. د کابل ښاروالۍ مشرتابه د پروژو له بېلابېلو پړاونو څخه څارنه کوي ترڅو یادې پروژې په معیاري توګه بشپړې او په چارو کې ځنډ رامنځته نشي