د نهمې ناحیې اړوند د هوایي ډګر له څلورلارې څخه د کابل – جلال آباد سړک په اوږدو کې د ګمرک تر سیمې پورې د (۲۷۹۴) مترو په اوږدوالي او د (۶۰) مترو په سور سره د نوي نښلوونکي سړک د جوړولو چارې ښه کاري پرمختګ لري. ټاکل شوې ده د دې سړک د یوې لیکې چارې د ژمي تر را رسېدو وړاندې بشپړې او د ترافیکو پرمخ پرانیستل شي. د سړک جوړونې په دې مهمه پروژه کې د (۱۴۵۰) مترو په اوږدوالي، له (۲) څخه تر(۲.۵) مترو پورې سور، د (۱.۱۰) او (۱.۶۰) مترو په ژوروالي یو کانال، د (۴۲) او (۵۰) مترو په اوږدوالي، له یو څخه تر(۳) مترو پورې په سور سره د (۳) کوچنیو پلونو، او دغه راز د لښتيو، ګلدانونو، د بایسکل چلولو لیکو، او تم ځایونو جوړول او د یوه معیاري سړک نور جزئیات هم په پام کې نیول شوي دي چې، د راتلونکي کال تر نیمايي پورې به یې چارې بشپړې شي. د دې سړک په جوړېدو سره به د کابل- جلال آباد سړک، مکروریانو ، صحت عامې او د هوايي ډګر په څلورلارو کې ترافیکي ستونزې هوارې او د سیمو اقتصادي ودې ته به زمینه برابره شي