د دولسمې ناحیې اړوند د احمد شاه بابا مېنې له ګولایي څخه د امنیت ښارګوټي تر سړک پورې د (۷۲۸) مترو په اوږدوالی او (۴۰) مترو په سور سره د نوي سړک د جوړولو چارې په چټکۍ سره روانې دي. دغه راز د یاد سړک په اوږدو کې د (۷۵۰) مترو په اوږدوالي، د یو متر په سور او د (۱.۳) مترو په ژوروالي سره یو کانال هم جوړېږي. د کابل ښاروالۍ د برنامو او پروژو د تنظیم ریاست د معلوماتو له مخې؛ هڅه کیږي چې د یاد سړک د جوړولو چارې د روان کال په بهیر کې بشپړې شي. د یادونې وړ ده چې، په یاده پروژه کې د لښتیو، ګلدانونو او د بایسکل چلولو لیکو جوړول، په سړک د کرښو اچول او د یوه معیاري سړک نورې برخې هم شاملې دي. د یاد سړک په جوړېدو سره به د احمدشاه بابا مېنې او امنیت ښارګوټي د اوسېدونکو ګڼې ستونزې هوارې او د سیمې اقتصادي ودې ته به زمینه برابره شي