د کابل ښاروالۍ د کار، ساتنې او څارنې ریاست له خوا د پنځمې، شپږمې او دیارلسمې ناحیې اړوند د دیوان بیګي له سیمې څخه تر مهتاب قلعه پورې د نوي نښلونکي سړک د جوړولو لومړنۍ چارې پیل شوې. دغه سړک چې د کمپنۍ سړک له برچي سړک سره نښلوي، (۱۷۳۳) متره اوږدوالی او (۳۰) متره سور لري، او د یوه کاري کال په موده کې به په معیاري او اساسي بڼه جوړ شي. د دغه سړک په اوږدو کې (۲۲۳) ملکیتونه استملاک شوي، چې د استملاک قانون له مخې به یې مالکانو ته بدیل حقوق ورکړل شي. دغه راز د یاد سړک په اوږدو کې میشتو ښاریانو د کابل ښاروالۍ د ټولګټو پروژو له پلي کېدو څخه خپل ملاتړ اعلان کړ او ژمنه یې وکړه چې، د استملاک شویو ملکیتونو په پاکولو او د دغه مهمې پروژې د پلي کولو په برخه کې به له کابل ښاروالۍ سره مرسته وکړي. د يادونې وړ ده، چې په دې پروژه کې د کابل سیند د پاسه د موټرو د تګ راتګ لپاره د یوه اساسي پله جوړول هم شامل دي