د کابل ښاروالۍ د کار، ساتنې او مراقبت ریاست له لوري د کابل شمال- لوېدیځ نښلوونکي سړک د پاتې بنسټیزې برخې د جوړولو چارې په چټکۍ سره روانې دي ترڅو قیر کولو ته چمتو شي. دغه مهم نښلوونکی سړک له ذاکرین ښارګوټي څخه تر قرغې سړک پورې د (۷۶۴۵) مترو په اوږدوالي او (۳۰) مترو په سور سره د اوولسمې او پنځمې ناحیې ترمنځ د جوړېدو په حال کې دی چې، تر اوسه یې څه باندې څلور کیلو متره برخه قیر شوې ده او د پاتې برخې قیر چارې به یې هم ډېر ژر بشپړې او د ترافیکو پر مخ به پرانیستل شي. د یادې پروژې د ځنډ لامل، د غره د لمنې کیندنه، هوارول او د سړک په اوږدو کې د استنادي دېوالونو جوړول بلل کیږي. د دې نښلوونکي سړک په جوړېدو سره به د خیرخانې کوتل سړک، سرای شمالي او ورڅېرمه سیمو کې ترافیکي ګڼه ګوڼه د پام وړ کمښت ومومي او ورسره جوخت به ښاریانو ته ګڼې ترانسپورتي آسانتیاوې رامنځته شي