په کابل ښار کې د لوحو او اعلاناتو د تنظیم او اصلاح په اړه د اطلاعاتو او فرهنګ وزارت، کابل ښاروالۍ او د کابل ښار د کسبګرو خونې او هټیوالو د استازو ترمنځ د همغږۍ غونډه د بهرنیو چارو وزارت د سیاسي مرستیال مولوي شېرمحمد عباس ستانکزي په ګډون په چهلستون ماڼۍ کې ترسره شوه. په دې غونډه کې د بهرنيو چارو وزارت سياسي مرستيال په خپلو خبرو کې د ښاري فرهنګ د ودې په برخه کې د يادو ادارو د مسئولينو کړنې او فعاليتونه د ستايلو وړ وبلل او هيله يې څرګنده کړه، چې د افغانستان اصیل فرهنګ به نور هم پياوړى او د هېواد رسمي ژبو د پياوړو اصطلاحاتو لپاره به لا ډېر کار وشي. دغه راز ښاغلي ستانکزي زیاته کړه چې، په ښار کې لوحې او اعلانونه باید په ملي ژبو ولیکل شي. وروسته د اطلاعاتو او فرهنګ وزارت د نشراتو معینیت سرپرست مولوي ضياالحق حقمل هم خبرې وکړې او ويې ويل: هغه شمېر لوحې او د خبرتیا تابلوګانې چې پخوا په بهرنیو ژبو لیکل شوې وې، یا غیرشرعي انځورونه، غلط متن او محتوای یې درلودې، یا په نامناسب ځای کې نصب او ځړول شوې وې؛ تر یوه حده پورې تنظیم او اصلاح شوې او دا لړۍ دوام لري. نوموړي دکابل ښار له ټولو هټیوالو او د بېلابېلو سوداګریزو اتحادیو څخه غوښتنه وکړه چې، په دې ملي کار کې دې له مسئولو ادارو سره همکاري وکړي. ورته مهال د کابل ښاروالۍ د کلتوري چارو رئيس قاري ولي ګل جواد و ویل: د ښار په ځینو سيمو کې د لوحو په بڼه کې د لوحو او اعلانانو د اصلاح کمېسيون له خوا او د هټيوالو په مرسته اصلاحات رامنځته شوي دي، او دا کار به د عمومي اصلاحاتو تر راوستلو دوام ولري. ښآغلي جواد زیاته کړه: د زړو لوحو او داعلانونو د تختو پاکول او لرې کول، چې د ښار بڼه یې زیانمنه کړې د یاد کمیسیون په عملیاتي پلان کې شامل دي چې، په راتلونکي کې به ټولې ښاري سیمې تر پوښښ لاندې راولي. د يادونې وړ ده چې، په لوحو او اعلانونو کې د بهرنيو ژبو د کلیمو او اصطلاحاتو د سمون په برخه کې د لوحو او تابلوګانو د اصلاح کميسيون؛ د هغو بدیل کلیمې او اصطلاحات ټاکلي چې، په ملي او سیمه ییزو ژبو کې ښه مفهوم افاده کوي. په پای کې د غونډې ګډون والو د دغې لړۍ په پلي کولو کې د کسبګرو خونې او د بېلابېلو اصنافو د استازو د مرستې غوښتنه وکړه