د چارو د کیفیت او چټکتیا په موخه، کابل ښاروال تېره ورځ مازدیګر مهال د درېیمې ناحیې اړوند له دهمزنګ څخه تر کوټه سنګي ( میرویس میدان) پورې د اصلي سړک او د شپږمې ناحیې اړوند د کارته سه په سیمه کې د (۵) فرعي سړکونو له قیر چارو لیدنه وکړه او د يادو سړکونو د قیر چارو پر بشپړېدو د ټينګار سربېره یې وويل: د ژمي تر را رسېدو وړاندې د ښار په کچه د یو شمېر سړکونو قیر چارې باید بشپړې او د ترافیکو پرمخ پرانیستل شي. کابل ښاروال وړاندې وویل: د سړک جوړونې چارې باید په صداقت، ایماندارۍ او له غفلت پرته ترسره شي او قراردادي شرکتونه مکلف دي ترڅو د سړکونو چارې د ډیزاین او تخنیکي سندونو له مخې په ټاکلي وخت او په ښه کیفیت ترسره کړي. د کابل ښاروال په وینا؛ هېڅ چاته اجازه نه ورکول کیږي چې، د سړکونو او نورو ټولګټو پروژو چارې بې کیفیته ترسره کړي او د ملي شتمنۍ د بې ځایه لګښت او فرصتونو د له منځه تلو لامل وګرځي. نوموړي سپارښتنه وکړه چې، د کار په بهیر کې دې د خوندیتوب مسایلو ته هم په جدي توګه پام وشي. کابل ښاروال تل تر کار لاندې پروژو د چارو له څرنګوالي څارنه کوي ترڅو کابل ښار د ښاریانو د غوښتونو پر بنسټ آباد او د بیت المال او ملي شتمنۍ له بې ځایه لګښت څخه مخنیوی وشي