د شپږمې او اوومې ناحیو اړوند له دارالامان ماڼۍ څخه تر فیصل ښارګوټي پورې د ګلباغ سړک د لومړۍ برخې قیر چارې د بنسټیزو چارو تر بشپړېدو وروسته پیل شوې. د کابل ښاروالۍ د برنامو او پروژو د تنظیم ریاست د معلوماتو له مخې؛ دغه سړک چې، (۳۱۷۶) متره اوږدوالی او (۳۳) متره سور لري؛ د (۱۶۰۰) مترو په اوږدوالي برخه یې قیر کولو ته چمتو شوې او د پاتې برخې په جوړولو یې کار روان دی، ترڅو هغه هم قیر کولو ته چمتو شي. د سړک جوړولو په دې پروژه کې د لښتیو او ګلدانونو جوړول، او دیوه معیاري سړک نور جزئیات هم شامل دي چې، د روان کال په بهیر کې به یې چارې بشپړې او ګټې اخیستنې ته وسپارل شي. د سړک جوړونې دغه پروژه د ښار د تلپاتې ودې او پراختیا او غوره ترانسپورتي زیربناوو ته د لاسرسي په برخه کې ځانګړی ارزښت لري