د کابل ښاروالۍ له خوا او د ملګرو ملتونو د پروژوي خدمتونو د دفتر په مرسته، د دوه ویشتمې ناحیې اړوند د اوولسم ګذر د سرتوران په سیمه کې د (۷) میلیونه افغانیو په لګښت د فرعي سړک د جوړولو چارې پیل شوې. د یادې سیمې د اوسېدونکو په استازیتوب ملا عبدالسلام ضعیف خبرې وکړې او ویې ویل: اوس مهال ښاریانو ته د آسانتیاوو رامنځته کولو په برخه کې پیاوړې اراده شته چې، د ښاریانو په مرسته به رغنیزې پروژوې په معیاري او اساسي توګه پلې شي. نوموړي د ښاریانو د ستونزو د له منځه وړلو په برخه کې د کابل ښاروالۍ کړنې وستایلې او ټینګار یې وکړ چې، اوس د دې وخت را رسېدلی ترڅو د کابل ښار د آبادۍ په موخه یو بل ته لاسونه ورکړو. ورته مهال د دوه ویشتمې ناحیې رئیس مولوي محمود خبرې وکړې او ویې ویل: دغه پروژو له ښاري آسانتیاوو څخه د محرومو سیمو اوسېدونکو ته د کاري بوختیاوو او ترانسپورتي آسانتیاوو رامنځته کولو په برخه کې ځانګړی اهمیت لري او د سیمې له اوسېدونکو یې وغوښتل چې، د دې پروژې په پلي کېدو کې مرسته وکړي. دغه راز د کابل ښاروالۍ د برنامو او پروژو د تنظیم ریاست د غیر اختیاري پروژو د څارنې آمر انجنیر ذبیح الله رحیمي ددې پروژې په اړه معلومات ورکړل او ویې ویل: دغه سړک چې (۴۵۰) متره اوږدوالی او (۶) متره سور لري، د لښتیو په ګډون به یې د جوړولو چارې د نږدې دوو میاشتو په موده کې بشپړې او ورسره جوخت به د اړوند سیمو اوسېدونکو ته ګڼې آسانتیاوې رامنځته شي. د یادونې وړ ده چې، په دې پروژه کې یو شمېر هېوادوالو ته د کار زمینه هم برابره شوې ده