ترانسپورتي او ښاري زیربناوو ته د لاس رسي په موخه د کابل- لوګر سړک د لومړۍ برخې د جوړولو چارې د کابل ښاروالۍ د ودانیزو چارو د مرستیال انجنیر عامر زمرک یاسر او د یادې ادارې د یو شمېر رئیسانو په شتون کې د ۷ کیلو مترو په اوږدوالي، د ۶۰ مترو په سور او د ۹۲۰ میلیونه افغانیو په ارزښت بیا پیل شوې. د کابل ښاروالۍ د ودانیزو چارو مرستیال په دې اړه وویل: د سړک جوړونې د دې مهمې پروژې د جوړولو مسئولیت مخکې د ټولګټو چارو وزارت په غاړه وو چې، د یو شمېر دلایلو له امله یې کار ځنډېلی وو. د نوموړي په وینا؛ دا چې، د کابل- لوګر سړک پاتې برخه د ښار په داخل کې موقعیت لري د جوړولو چارې یې د ا.ا.ا کابینې شورا د پریکړې په اساس کابل ښاروالۍ ته وسپارل شوې. د ودانیزو چارو مرستیال وړاندې وویل چې، د دې سړک استملاکي چارې مخکې په بشپړه توګه ترسره شوې دي او د سړک اساسي کار ته زمینه برابره ده. ښاغلي یاسر زیاته کړه چې، دا سړک د کابل ښار په د ننه کې یو مهم سړک دی چې، کابل د جنوب او جنوب ختیځ له شپږو ولایتونو سره نښلوي. په همدې توګه یاد سړک د اقتصادي ودې په برخه کې هم ځانګړی ارزښت لري چې، د ګڼه ګوڼې د کمښت او د ترافیکي زیربناوو رامنځته کولو په برخه کې به ګټور تمام شي. د کابل- لوګر سړک لومړۍ برخه ( له نجات څلي څخه تر چرخ آب سیمې پورې) په دوه اصلي او دوه فرعي لیکو کې جوړېږي چې، د یوه معیاري سړک ټول جرئیات په بر کې نیسي او دوه کلنو په موده کې به جوړ او ګټې اخیستنې ته وسپارل شي. د ټولنیزې او اقتصادي ودې په برخه کې د ټولګټو پروژو پلان او پلي کول د کابل ښاروالۍ لومړیتوب دی ترڅو په دې توګه ښاریانو ته سوکاله او هوسا ژوند رامنځته شي