له پرلپسې خبرتیاوو وروسته، د کابل ښاروالۍ له لوري د اوومې ناحیې اړوند له علاءالدین درې لارې څخه تر تخنیکم پورې د نوي نښلوونکي سړک د جوړولو پر وړاندې د شته استملاکي خنډونو د پاکولو چارې د یاد سړک په اوږدو کې د میشتو ښاریانو په مرسته پیل شوې. د اوومې ناحیې رئیس مولوي فضل الحق مجاهد په دې اړه وویل: دغه نوی جوړېدونکی سړک چې، (۱۷۹۴) متره اوږدوالی او (۳۰) متره سور لري؛ د دارالامان سړک له چهلستون سیمې سره نښلوي او د ترانسپورتي ستونزو د حل او د سیمې د اقتصادي ودې په برخه کې ځانګړی ارزښت لري. نوموړي د یاد سړک په اوږدو کې له میشتو ښاریانو څخه چې، د خپلو استملاکي کورونو د ویجاړولو په اړه یې اقدام کړی مننه وکړه او زیاته یې کړه: د دې سړک په اوږدو کې (۲۵۶) ملکیتونه تر استملاک لاندې دي چې، د استملاک قانون له مخې به یې مالکانو ته بدیل حقونه ورکړل شي