د لسمې ناحیې اړوند د شېرپور سړک چې (۶۴۶) متره اوږدوالی او (۲۰) متره سور لري د جوړولو او پراختیا چارې يې د کابل ښاروالۍ له خوا پیل شوې. د کابل ښار د سړکونو او شبکو د اصلاحې پلان له مخې، د یاد سړک د جوړولو په دې پروژه کې چې، د شېرپور له دویم سړک څخه د شهرنو تر شهید څلورلارې پورې پلې کېږي دلښتیو، پلولارو او د یوه معیاري سړک د نورو جزئیاتو جوړول هم شامل دي. د دغه سړک په جوړېدو سره به په سیمه او ورڅېرمه سړکونو کې ترافیکي ګڼه ګوڼه کمښت ومومي. د یادولو وړ ده چې، اوسمهال د کابل ښار د سړکونو د شبکې اصلاحي پلان د پلي کېدو په حال کې دی، چې د ټولو برخو (ټولنیزو او اقتصادي جوړښتونو) منطقي تړاو په پام کې نیول شوی او د یوه پرمخ ودې ښار لپاره مناسب ګڼل کېږي