ښاریانو ته د ترانسپورتي آسانتیاوو رامنځته کولو په موخه، د کابل ښاروالۍ له خوا او د ملګرو ملتونو د پروژوي خدمتونو د دفتر په مرسته، د لومړۍ ناحیې په دویم ګذر کې د (۵۶۰) مترو په اوږدوالي او له (۵) څخه تر (۵،۷) مترو په سور د یوه فرعي سړک د جوړولو چارې روانې دي. د لومړۍ ناحيې رئیس مولوي محمد عالم عاصم په دې اړه وويل: د سړک جوړولو په دې پروژه کې د لښتیو او د (٣٥٠) مترو په اوږدوالي، (۱،۵) مترو په سور او د (٢،٥) مترو په لوړوالي سره د یوه استنادي دېوال جوړول هم شامل دي، چې تر اوسه یې (۴۵) سلنه چارې مخته تللې دي. ښاغلي عاصم زیاته کړه چې، د دې سړک په جوړیدو سره به د سیمې د اوسیدونکو سیمه ییزې ستونزې هوارې او دوی ته به ترانسپورتي او ګڼې ټولنیزې آسانتیاوې رامنځته شي. د یادونې وړ ده چې، د دې پروژې له لارې یو شمېر هېوادوالو ته د کار زمینه هم برابره شوې ده