د بنسټیزو برخو تر بشپړېدو او په لابراتوار کې د ودانیزو توکو تر آزمویښت وروسته، د هوايي ډګر له څلورلارې څخه تر ګمرک سیمې پورې د نوي سړک قیر چارې پیل شوې. د کابل ښاروالۍ د برنامو او پروژو د تنظیم ریاست د زیربنايي پروژو د څارنې آمر انجنیر محمد حامد سادات په وینا؛ دغه سړک چې، (۲۷۹۴) متره اوږدوالی او (۶۰) متره سور لري، اوس مهال یې د دوو کیلو مترو په اوږدوالي د یوې لیکې قیر چارې ترسره کیږي. دا سړک د لښتیو، کانال، پلو لارو، ګلدانونو، د بایسکل چلولو لیکو، څراغونو، په سړک د کرښو اچولو، ترافیکي نښو او د یوه معیاري سړک د نورو برخو په ګډون د جوړېدو په حال کې دی چې، چارې به یې پرته له ځند څخه د هوا د ښه والي په صورت کې روانې وي. د دې سړک په جوړېدو سره به له یوې خوا د صحت عامې او مکروریانو څلورلارو او د ورڅېرمه سړکونو ترافیکي ګڼه ګوڼه کمښت ومومي او بله خوا به د سیمو اقتصادي ودې ته زمینه برابره شي