له دیوان بیګي څخه تر مهاب قلعه پورې د نوي نښلوونکي سړک د جوړولو پر وړاندې خنډونه (استملاک شوي ملکیتونه) د یاد سړک په اوږدو کې د میشتو ښاریانو په مرسته پاک شول او ډېر ژر به د دې سړک د جوړولو اساسي چارې پیل شي. دغه سړک د (۱۷۳۳) مترو په اوږدوالي او (۳۰) مترو سور سره په پنځمه، شپږمه او دیارلسمه ناحیه کې موقعیت لري، چې د کمپنۍ سړک د برچي له سړک سره نښلوي او د جوړولو چارې به یې د کابل ښاروالۍ د کار، ساتنې او مراقبت ریاست له لوري د نږدې یوه کال په موده کې بشپړې شي. د سړک جوړولو په دې پروژه کې د پلو لارو، لښتیو، د بایسکل چلولو لیکو او ګلدانونو جوړول، د څراغونو نصبول او په سړک د کرښو اچول هم شامل دي چې، په بشپړېدو سره به یې د سیمې د اوسېدونکو ترانسپورتي ستونزې هوارې او د کابل ښار د لوېدیځ زون اقتصادي ودې ته به زمینه برابره شي. د یادونې وړ ده چې، اوس مهال د یاد سړک په اوږدو کې د کېندونو او خاورې لېږدولو چارې روانې دي.