د هوايي ډګر له څلورلارې څخه تر ګمرک سیمې پورې د نوي سړک د جوړولو چارې چې، د هوا د سړښت له امله ځنډېدلې وې بیا پیل شوې. د کابل ښاروالۍ د برنامو او پروژو د تنظیم ریاست د معلوماتو له مخې؛ دغه سړک چې، (۲۷۹۴) متره اوږدوالی او (۶۰) متره سور لري، د (۱۱۰۰) متره برخې قیر چارې یې له ژمي وړاندې په دوه لیکو کې ترسره شوې او اوس مهال یې د پاتې برخو په جوړولو کار روان دی ترڅو هغه هم قیر کولو ته چمتو شي. د سړک جوړولو په دغه پروژه کې د لښتیو، کانال، پلو لارو، ګلدانونو، د بایسکل چلولو لیکو جوړول، د ترافیکي نښو او څراغونو نصبول، په سړک د کرښو اچول، او د یوه معیاري سړک نورې برخې شاملې دي چې، د کار له کیفیت څخه یې په بیلابېلو پړاونو کې فني او تخنیکي څارنې ترسره کیږي. د دې سړک په جوړېدو سره به له یوې خوا د صحت عامې او مکروریانو څلورلارو او په ورڅېرمه سړکونو کې ترافیکي ګڼه ګوڼه کمښت ومومي او بله خوا به د کابل ښار اقتصادي ودې ته زمینه برابره شي.