د کابل ښاروالۍ د زرغونتیا ریاست له لوري د خیرخانې کوتل سړک په اوږدو کې د آزادۍ په پارک او د میوې مارکېټ له څلورلارې څخه تر تنظیف څلورلارې به د سړک په اوږدو کې د ۴۷۷۵ مورپان، ناجو او سرو نیالګیو د کېنولو چارې پیل شوې. د زرغونتیا رئیس مولوي عبدالوکیل متوکل په دې اړه وویل: ټاکل شوې ده له پورته یاد شوي شمېر څخه ۳۵۰۰ په آزادۍ پارک او ۱۲۷۵ نور یې د میوې مارکېټ له څلورلارې څخه تر تنظیف څلورلارې پورې د سړک په اوږدو کې کېنول شي. نوموړي زیاته کړه چې، د پلان له مخې مخکې د آزادۍ پارک او د مارکېټ او تنظیف څلورلارو زرغونې سیمې بیارغول شوې دي او د نیالګیو کېنولو لپاره چمتو دي او اوس به په معیاري توګه پکې نیالګي کېنول شي ترڅو د ښار په ښکلا او د ښاریانو په رواني دید کې مثبت بدلون راشي. د زرغونتیا رئیس یو ځل بیا له ښاریانو غوښتنه وکړه چې، د زرغونو سیمو په ساتنه او خړوبولو کې د کابل ښاروالۍ له زرغون اغوستونکو سره مرسته وکړي