په دویمه ناحیه کې د نیالګیو کېنولو کمپاین د کابل ښاروالۍ د ټولنيزو او کلتوري چارو مرستیال حاجي محمد نبي عثماني، د کابل ښاروالۍ د يو شمېر رئیسانو، د یادې ناحیې ځیني علماوو، ګذر وکيلانو او ځوانانو په ګډون پيل شو. په هغه مراسمو کې چې له همدې امله جوړ شوي ؤ، د دويمې ناحيې رئیس مولوي فضل کريم صديقي، د کابل ښاروالۍ د کلتوري چارو رئيس قاري ولي ګل جواد، د ټولنيزو او عامه چارو د همغږۍ رئيس قاري انعام الله قاضي زاده او د زرغونتیا رياست تخنيکي مرستيال سراج الدين پټان هر يو په خپل وار سره د نيالګيو ايښودلو د ارزښت په اړه خبرې وکړې او ویې ویل: د زرغونو سیمو د پراختیا لپاره د نیالګیو کېنولو موسم ښه فرصت دی، په دې موسم کې باید نیالګي کېنوو او په دوامداره توګه ترې ساتنه وکړو. د دوی په وینا؛ د دویمې ناحیې د زرغونو سیمو د پراختیا په موخه به زرګونه نیالګي په معیاري توګه کېنول شي. د یادونې وړ ده چې، د دویمې ناحیې د بېلابېلو سیمو دزرغونتیا په موخه، یو شمېر سوداګرو او پانګوالو د (۲۸۰۰) نیالګيو مرسته کړې ده.