د ښاري سیمو د زرغونتیا په موخه، د پنځلسمې ناحیې اړوند د قصبې په زرغون کمربند کې د بادام، پستې، ارغوان، مورپان او ناجو د (۶۴۵۰) نیالګیو اېښودلو چارې د کابل ښاروالۍ د زرغونتیا ریاست او د 15 ناحیې د مسئولینو، د یادې ناحیې د علماوو شورا غړو، ګذر وکیلانو او ځوانانو په ګډون پیل شوې. د زرغونتیا رئیس مولوي عبدالوکیل متوکل په دې تړاو وویل: د قصبې د زرغون کمربند پروژه چې په ټولیزه توګه (۲۳۶) هکتاره مساحت لري، د پراختیا په موخه یې د کابل ښاروالۍ د زرغونتیا ریاست له خوا د خړوبولو، د نیالګیو کېنولو او پالنې ګڼ پلانونه ترلاس لاندې دي. ښاغلي متوکل زياته کړه، چې د قصبې په زرغون کمربند کې تر دې وړاندې څلوېښت زره نیالګي کېنول شوي، چې د نویو نيالګيو په کېنولو سره به دغه شمېره نوره هم لوړه شي. کابل ښاروالي د ښار په دننه کې د زرغونو سیمو د پراختیا سربېره، د کابل ښار شاوخوا غرونو او د تپو زرغونتیا ته هم پام کوي ترڅو کابل ښاریانو ته یو آرام، پاک او سوکاله ښاري چاپېریال رامنځته شي