د اوولسمې ناحیې د مسئولانو له لوري د یادې ناحیې په بازارونو کې د نرخنامې د تطبیق له څرنګوالي څارنه وشوه او سرغړونکي له تادیب او سپارښتنو سره مخ شول. د اوولسمې ناحیې رئیس مولوي حبیب الحق حقاني وویل: په هټیو، لویو پلورنځیو او قصابیو کې د لومړنیو خوراکي توکو له نرخونو څارنه وشوه، هغه کسان چې، توکي یې له نرخنامې سره برابر پلورل لا وهڅول شول او چا چې سرغړونه درلوده د اصلاح په موخه ورته اړینې سپارښتنې وشوې. نوموړي زیاته کړه چې، د ښاریانو د روغتیا خوندیتوب په موخه به د توکو له نیټې او کیفیت څخه څارنې هم دوام ولري