د اتمې ناحیې اوسېدونکو د (۲۰۰۰) نیالګیو او (۵۰۰) ګلدانیو په چمتو کولو سره د ښار په زرغونتیا کې برخه واخیسته. د یادې ناحیې رئیس مفتي روح الله عثماني له هغه ښاریانو چې، د ښار په زرغونتیا کې یې برخه اخیستې مننه وکړه او ویې ویل: دغه نیالګي به د رحمن مېنې په پارک کې کېنول شي او د یادې ناحیې د پارکونو او نورو سیمو زرغونتیا ته به هم پراختیا ورکړل شي. نوموړي زیاته کړه چې، د ښار په زرغونتیا کې د ښاریانو رول مهم دی او که چېرې هر ښاري د خپلې سیمې زرغونتیا ته پام وکړي، ډېر ژر به د یوه ښایسته، زرغون او سمسور کابل ښار شاهدان و اوسو. ورته مهال د سیمې اوسېدونکو او ګذر وکیلانو د اتمې ناحیې د زرغونو سیمو په پراختیا کې د مرستې ژمنه وکړه او ویې ویل چې له کېنول شویو نیالګیو څخه به په دوامداره توګه ساتنه وکړي.