د کابل ښاروالۍ د برنامو او پروژو د تنظیم ریاست له خوا د مکروریانو له څلورلارې څخه تر تنګي غارو پورې د سړک د لومړۍ برخې د جوړولو چارې و اروزل شوې او په بنسټزه برخه کې یې د بې کیفیته موادو له کارولو څخه مخنیوی وشو. قراردادي شرکت ته په ټینګار سره وویل شول چې، د پروژو په پلي کولو کې سرغړونې د کابل ښاروالۍ مشرتابه او خلکو ته د منلو وړ نه دي او په جدي توګه څارل کیږي. دغه سړک چې (۹۳۹۷) متره اوږدوالی او (۶۰) متره سور لري، اوس مهال یې د لښتیو جوړولو، کېندنو، خاورې لېږدولو او هوارولو چارې روانې دي او د کار له کیفیت څخه یې په بېلابېلو پړاونو کې فني او تخنیکي څارنې ترسره کیږي. د سړک جوړولو په دغه پروژه کې د لښتیو، کانال، پلو لارو، ګلدانونو، د بایسکل چلولو لیکو جوړول، د ترافیکي نښو او څراغونو نصبول، په سړک د کرښو اچول، او د یوه معیاري سړک نورې برخې شاملې دي چې، چارې به یې د روان کال په بهیر کې بشپړې او ګټې اخیستنې ته به وسپارل شي. د یاد سړک په جوړېدو سره به د کابل د ختیځ زون اقتصادي ودې ته زمینه برابره او ګڼې ترانسپورتي آسانتیاوې به رامنځته شي