په ۲۱مه ناحیه کې د نیالګیو کینولو کمپاین د دې ناحیې اړوند د پلچرخي سیمې په (سبز ښوونځي) کې د کابل ښاروالۍ د زرغونتیا رئیس مولوي عبدالوکیل متوکل، د ۲۱مې ناحیې رئیس حافظ حیات الله حیات، علماوو، ګذر وکیلانو او ځوانانو په ګډون پيل شو. په هغه مراسمو کې چې له همدې امله جوړ شوي ؤ، د کابل ښاروالۍ د زرغونتیا رئیس د نیالګیو پر اهمیت او د زرغونو سیمو د جوړولو په اړه خبرې وکړې او ویې ویل: د نیالګیو او ونو په ساتنه او پالنه کې د سیمې د اوسېدونکو مرسته اړینه ده، کابل ښاروالۍ به د نیالګیو د خړوبولو او پالنې په برخه کې خپل پلانونه د ښاریانو په مرسته پلي کړي. دغه راز د ۲۱مې ناحيې رئيس په خپلو خبرو کې وويل: د نيالګيو ايښودل يو الهي امر دی او د انسانانو په ژوند کې ډېرې ګټې لري، د کابل ښار د ښکلا او زرغونتیا په موخه، هر ښاري باید یو نیالګی کېنوي او پالنه یې وکړي. پاتې دې نه وي چې، په ۲۱ ناحیه کې به د زرغونو سیمو د جوړولو او پراختیا لپاره د کابل ښاروالۍ دزرغونتیا ریاست لخوا په پام کې نیول شوي پلانونه د یوه سالم ښاري چاپېریال د رامنځته کولو په موخه پلي شي