د کابل ښاروالۍ د مسئولینو، د درېیمې ناحیې دیني عالمانو، ګذر وکیلانو او ځوانانو په ګډون د یادې ناحیې په کچه د نیالګیو کېنولو کمپاین پیل شو. د کابل ښاروالۍ د زرغونتیا رئیس مولوي عبدالوکیل متوکل، د درېیمې ناحیې مرستیال مفتي اختر محمد عثماتي او یو شمېر نورو ګډون والو د نیالګیو د ارزښت په اړه خبرې وکړې او ویې ویل: د نیالګیو کېنولو موسم د زرغونو سیمو د پراختیا لپاره یو ښه فرصت دی او اړتیا ده چې، ټول نیالګي کېنوو او ساتنه یې وکړو. د دوی په وینا؛ د زرغونتیا ریاست به د درېیمې ناحیې په کچه زرګونه نیالګي کېنوي او په دوامداره توګه به یې ساتنه وشي. اړتیا ده چې، ښاریان د خپلو ملکیتونو مخې ته او په نورو ښاري سیمو کې د نیالګیو په ساتنه او خړوبولو کې له کابل ښاروالۍ سره مرسته وکړي ترڅو د کابل ښار ښکلا او زرغونتیا نوره هم پراختیا ومومي. د یادونې وړ ده چې، د درېیمې ناحیې د یو شمېر ښاریانو له خوا هم بېلابېل نیالګي چمتو شوي دي او په نږدې ورځو کې به نور ښاریان هم نیالګي چمتو کړي.
په درېیمه ناحیه کې د نیالګیو کېنولو کمپاین پیل شو