د کابل ښاروالۍ د برنامو او پروژو ریاست له لوري د درېیمې ناحیې اړوند له دهمزنګ څخه تر کوټه سنګي ( میرویس میدان) پورې د سړک د جوړولو او پراختیا په پروژه کې له بې کیفیته کار څخه مخنیوی وشو او هغه برخې یې چې، د تخنیکي ستونزو له امله یې درز پیدا کړی وو ویجاړې شوې. د کابل ښاروالۍ د برنامو او پروژو د تنظیم رئیس انجنیر میرالرحمن ناصري په دې اړه وویل: د یادې ستونزې د رامنځته کېدو دلیل په سړو موسم کې د تدابیرو نشتون دی چې، ویجاړې شوې برخې به بېرته په معیاري توګه جوړې شي. نوموړي ډاډ څرګند کړ چې، د سړک جوړونې پروژو له چارو څخه د کیفیت د تضمین په موخه څارنې کیږي او هېڅ چاته به اجازه ورنه کړل شي چې، د سړک جوړونې په پروژو کې غفلت وکړي او د ملي شتمنۍ د بې ځایه لګښت سبب وګرځي. له دهمزنګ څخه تر کوټه سنګي پورې د سړک د جوړولو او پراختیا پروژه ۳۲۲۶ متره اوږدوالی او ۳۰ متره سور لري چې، چارې یې تر اوسه ۷۴ سلنه مخته تللې دي. مخکې د غازي لېسې له مخې څخه تر دهبوري څلورلارې پورې د ۲۰۲۰ مترو په اوږدوالي او له دهبوري څلورلارې څخه د کوټه سنګي په لور په یوه لیکه کې د ۸۴۰ مترو په اوږدوالي برخه قیر شوې ده. د ویجاړو شویو برخو سربېره به د یاد سړک پاتې نورو برخې هم تر بنسټیزو چارو وروسته تر راتلونکو دوه میاشتو پورې قیر او د ترافیکو پرمخ به پرانیستل شي. دا سړک په یوه اصلي او یوه فرعي لیکه کې، د لښتیو، ګلدانونو، پلو لارو، کرښې اچولو او د یوه معیاري سړک د نورو برخو په ګډون د جوړېدو په حال کې دی. د یادونې وړ ده چې، د کیفیت تضمین او د کارونو ښه ترسره کول د کابل ښاروالۍ د قراردادونو مهمه برخه ده او د یادې پروژې چارې به د تسلیمۍ پر مهال یو ځل بیا و ارزول شي