د شپږمې او اوومې ناحیې اړوند له دارالامان ماڼۍ څخه تر فیصل ښارګوټي پورې د ګلباغ سړک د لومړۍ برخې د جوړولو او پراختیا چارې چې، د تخنیکي ستونزو له امله ځنډېلې وې، بیا پیل شوې. د کابل ښاروالۍ د برنامو او پروژو د تنظیم د رئیس انجنیر میرالرحمن ناصري په وینا؛ د یاد سړک د جوړولو قرارداد له مخکني شرکت سره د سرغړونې له امله لغوه شو او د دې سړک هغه برخې چې، په غیر معیاري توګه جوړې شوې وې ویجاړې شوې او بېرته به په اساسي توګه جوړې شي. ښاغلي ناصري زیاته کړه: د ګلباغ سړک د جوړولو او پراختیا پروژه چې، (۳۱۷۶) متره اوږدوالی او (۳۳) متره سور لري، د لښتیو، پلو لارو، ګلدانونو او د یوه معیاري سړک د نورو برخو په ګډون به د نوي قراردادي شرکت له خوا په ښه کیفیت او معیاري توګه د روان کال په بهیر کې ترسره شي. نوموړي زیاته کړه: کابل ښاروالۍ د ډیزاین او تخنیکي سندونو له مخې د پروژو پر کیفیت ټینګار کوي او هېڅ چاته به اجازه ورنه کړل شي چې، د بې کیفیته کار له امله د ملي شتمنۍ د بې ځایه لګښت لامل وګرځي. کابل ښاروالۍ به ډېر ژر له فیصل ښارګوټي څخه تر ګلباغ پله پورې د یاد سړک د دویمې برخې د جوړولو چارې هم پیل کړي چې، دا کار ترانسپورتي آسانتیاوو ته د لاس رسي او د سیمو د اقتصادي ودې په برخه کې ځانګړی ارزښت لري