د شپاړلسمې ناحیې اړوند د قلعه زمان خان له شپېته متره سړک څخه د کابل- جلال آباد تر سړک پورې د (۱۶۵۵) مترو په اوږدوالي او (۳۰) مترو په سور سره د نوي نښلوونکي سړک د جوړولو چارې د کابل ښاروالۍ له خوا روانې دي او ټاکل شوې ده د روان کال په بهیر کې بشپړې شي. د کابل ښاروالۍ د برنامو او پروژو د تنظیم ریاست د معلوماتو له مخې؛ په دغه پروژه کې د یوه معیاري سړک د نورو برخو سربېره، د کابل سیند د پاسه د یوه پله جوړول هم شامل دي چې چارې یې تر اوسه (۱۵) سلنه مخته تللی دی. د یادونې وړ ده چې، د یاد سړک په جوړېدو سره به ګڼې ترانسپورتي ستونزې هوارې او د سیمو اقتصادي ودې ته به زمینه برابره شي.