د کابل ښاروالۍ د کار، ساتنې او مراقبت ریاست له خوا د (۱۷۳۳) مترو په اوږدوالي او (۳۰) مترو په سور سره له دیوان بیګي څخه تر مهتاب قلعه پورې د نوي نښلوونکي سړک د جوړولو چارې روانې دي. دغه سړک چې، په پنځمه، شپږمه او دیارلسمه ناحیه کې موقعیت لري، د کمپنۍ سړک له برچي سیمې سره نښلوي او ټاکل شوې ده د روان کال په بهیر کې په اساسي توګه جوړ شي. د یادونې وړ ده چې، د سړک جوړولو په دې پروژه کې د موټرو د تګ راتګ لپاره د یوه اساسي پله، د پلو لارو، لښتیو، د بایسکل چلولو لیکو او ګلدانونو جوړول، د څراغونو نصبول او په سړک د کرښو اچول هم شامل دي. د دې سړک په جوړېدو سره به ترافیکي ستونزې هوارې او د ورڅېرمه سیمو اقتصادي ودې ته زمینه برابره شي.