د کابل- لوګر سړک د لومړۍ برخې د جوړولو په موخه، د غره د لمنې کېندنو، هوارولو او د لښتیو جوړولو چارې روانې دي. دغه سړک چې، له نجات څلي څخه تر چرخ آب سیمې پورې (۷) کیلو متره اوږدوالی او (۶۰) متره سور لري، د لښتیو، پلو لارو، ګلدانونو او تم ځایونو جوړولو، د څراغونو نصبولو، په سړک د کرښو اچولو او د یوه معیاري سړک د نورو برخو په ګډون به تر راتلونکو څوارلس میاشتو پورې جوړ شي. د کابل ښاروالۍ د برنامو او پروژو د تنظیم ریاست انجنیران د یادې پروژې له بېلابېلو پړاونو څخه په منظمه توګه فني او تخنیکي څارنې ترسره کوي ترڅو په لوړ کیفیت او ټاکلي وخت بشپړه شي. د کابل- لوګر سړک چې د کابل ښار یو له مهمو سړکونو شمېرل کیږي، د هېواد پنځه سویلي او سویل ختیځ ولایتونه له پلازمینې سره نښلوي او له خورا اقتصادي ارزښت څخه برخمن دی