د حمزه خیریه بنسټ د تنګي غارو اړوند زرغون کمربند او د قصبې سیمې دزرغونتیا په موخه، د شفتالو، ګیلاس، زردآلو، انار، پستې او انګورو (۱۱۰۰) نیالګیو په چمتو کولو او کېنولو سره د ښار په زرغونتیا کې برخه واخیسته. د کابل ښاروالۍ د زرغونتیا رياست فني مرستيال سراج الدين پټان د ياد بنسټ د هېواد پالنې له احساس څخه د ستاينې په ترڅ کې وويل: د تنګي غارو او قصبې سيمو د زرغون کمربند د پراختيا په موخه د کابل ښاروالۍ د زرغونتیا رياست ګڼ شمېر پلانونه ترلاس لاندې لري، چې د پلي کېدو په برخه کې یې د خصوصي سکټور او ښاريانو مرستې ته اړتیا ده. نوموړي زیاته کړه، د کابل ښاروالۍ د زرغونتیاریاست ژمن دی، چې په نږدې راتلونکي کې د هوسا ښاري ژوند، ذهني آرامتیا، پاکې هوا او د مناسب اقلیم د بدلون په موخه، د کابل ښار دننه، د غرونو په لمنو او د ښار شاوخوا سیمو کې زرغونو سیمو ته پراختیا ورکړي.