د کابل ښاروالۍ له خوا او د ملګرو ملتونو د پروژوي خدمتونو د دفتر په مرسته، د څوارلسمې ناحیې د اووم ګذر اړوند د قلعه وزیر سیمې په دانش مېنه کې د څلورو فرعي سړکونو د جوړولو چارې پیل شوې. دغه سړکونه چې په ټولیزه توګه (۱۰۳۰) متره اوږدوالی او له (۴.۷) څخه تر (۵.۹) مترو پورې سور لري، د لښتیو په ګډون به د دوه نیمو میاشتو په موده کې په اساسي توګه جوړ شي. د یادو پروژو د کار د کیفیت د تضمین په موخه، د کابل ښاروالۍ د برنامو او پروژو د تنظیم ریاست انجنیران فني او تخنیکي څارنې ترسره کوي. د یادونې وړ ده چې، په دې پروژو کې یو شمېر هېوادوالو ته د کار زمینه هم برابره شوې ده