د ښاري زیربناوو د پراختیا او ښاریانو ته د ترافیکي آسانتیاوو رامنځته کولو په موخه، د هوايي ډګر له څلورلارې څخه تر ګمرک سیمې پورې د نښلوونکي سړک د جوړولو چارې په چټکۍ سره روانې دي. د سړک جوړونې دغه مهمه پروژه چې، (۲۷۹۴) متره اوږدوالی او (۶۰) متره سور لري، د لښتیو، کانال، پلو لارو، ګلدانونو، د بایسکل چلولو لیکو جوړولو، په سړک د کرښو اچولو، د څراغونو او ترافیکي نښو نصبولو، او د یوه معیاري سړک د نورو برخو په ګډون به د روان کال په بهیر کې بشپړه او ګټې اخیستنې ته وسپارل شي. د دې سړک په جوړېدو سره به له یوې خوا د صحت عامې او مکروریانو څلورلارو او د ورڅېرمه سړکونو ترافیکي ګڼه ګوڼه کمښت ومومي او بله خوا به د سیمو اقتصادي ودې ته زمینه برابره شي. پاتې دې نه وي چې، د کابل ښاروالۍ د برنامو او پروژو د تنظیم ریاست انجنیران د یاد سړک د جوړېدو له چارو څخه په دوامداره توګه فني او تخنیکي څارنې ترسره کوي