د نیکمرغه لوی اختر د را رسېدو په مناسبت، د نرخونو د کنټرول او له احتکار څخه د مخنیوي کمیسیون د ۴۸مې ګڼې نرخنامې د جوړولو په موخه غونده ترسره شوه. د کابل ښاروالۍ دمارکیټونو د تنظیم رئیس مولوي مدثر محمد "یونس" وویل چې، په دې غونډه کې د کابل ښاروالۍ، د سوداګرۍ، مالیې، عدلیې، کورنیو چارو وزارتونه، د استخباراتو عمومي ریاست، د افغانستان بانک، د څارنې عمومي ریاست، د احصایې او معلوماتو ملي ادارې، د سوداګرۍ او پانګونې خونې، کسبګر او هټیوالو، د تیلو او ګاز امارتي شرکت، د نورم او استندرد ملی ادارې، او د اصنافو باصلاحبته استازو ګډون کړی ؤ. ښاغلي یونس زیاته کړه چې، د اړوندو ادارو او اتحادیو لخوا د وړاندې شويو نرخونو په پام کې نیولو سره، نرخونه و ارزول شول، او نوې نرخنامه چمتو شوه ترڅو د کابل ښاریان وکولی شي خپل د اړتیا وړ توکي له بازارونو څخه په مناسب قیمت او لوړ کیفیت ترلاسه کړي. دغه راز په دې غونډه کې، د کابل په بازارونو کې په لوړ قیمت د پلور د مخنیوي، له ګاونډیو هیوادونو څخه د لومړنیو توکو واردول او د افغانیو پر وړاندې د بهرنیو اسعارو په نرخونو کې د بدلون په اړه بحث وشو، ترڅو د ښار په بېلابېلو ناحیو کې د نرخنامې له تطبیق څخه په منظمه توګه څارنه وشي