په کابل ښار کې د ښکلا رامنځته کولو او د زرغونو سیمو د پراختیا په موخه، د کابل ښاروالۍ د زرغونتیا ریاست له خوا د پنځمې ناحیې اړوند د کمپنۍ سړک په ګلدان کې ، د مرسل (۵۰۰۰) بوټي ګلان کېنودل شول. دغه ګلدان، د کابل ښاروالۍ دزرغونتیا ریاست د پر لپسې هڅو په پایله کې اوس په یوه ښکلي او زرغون ځای بدل شوی دی. د زرغونتیا ریاست فني مرستیال سراج الدین پټان په دې اړه وویل:دغه ګلدان له میرویس میدان (کوټه سنګي) څخه د کمپنۍ تر څلور لارې پورې (۵) کیلومتره اوږدوالی لري، چې په هغه کې (۷۰،۰۰۰) د مرسل ګلان او زرګونه ونې پخوا کېنول شوي او د دغو (۵،۰۰۰) نورو ګلانو په ایښودلو سره به، د غه شمېره نوره هم لوړه شي. د نوموړي په وینا، په دې ګلدان کې ګڼ فعالیتونه لکه، د ونو اصلاح کول، شاخه بري، د چمن جوړول، د ګلدانونو لپاره د محافظتي کټارو نصبول، او د اوبو لګولو د سیستم جوړول، ترسره شوي دي. د یاد ریاست مسئولینو ډاډ ورکړی چې، له دغه ګلدان څخه به په دوامداره توګه څارنه کېږي ترڅو د هغه ښکلا او زرغونتیا نوره هم پراختیا ومومي