له سرای شمالي څخه د نادریې لېسې تر څلور لارې پورې د بادام باغ سړک د چارو بشپړېدل چې، د بره کي څلور لارې پر ځای له بدیلو لارو څخه ګڼل کیږي، د کابل ښاروالۍ د مشرتابه لپاره لومړیتوب لري. د کابل ښاروالۍ مشرتابه ټینګار کوي چې، دا پروژه باید په لنډ وخت کې بشپړه شي ترڅو د بره کي څلور لارې د چارو چټکتیا ته لاره هواره شي. د کابل ښاروالۍ د برنامو او پروژو د تنظیم ریاست د مسئولینو په وینا، اوس مهال د دې سړک د پاتې بنسټیزو برخو د جوړولو چارې روانې دي او ډیر ژر به قیر کولو ته چمتو شي. د سړک جوړولو په دغه پروژه کې چې، (۳۲۸۹) متره اوږدوالی، (۲۰) او (۳۰) متره سور لري، د لښتیو، پلولارو او ګلدانونو جوړول، په سړک د کرښو اچول او د یوه معیاري سړک نور جزئیات هم شامل دي. د دې پروژې د ځنډ لامل د سړک په اوږدو کې د برېښنا ستنو (پایو) شتون وو چې، اوس دا ستونزه هواره شوې او د جوړولو چارې یې په چټکۍ سره روانې دي. د پلان له مخې، دا سړک به په روان کال کې جوړ او ګټې اخیستنې ته وسپارل شي