په شپږمه او اوومه ناحیو کې له فیصل ښارګوټي څخه تر ګلباغ پله پورې د ګلباغ سړک د دویمې برخې د جوړولو او پراختیا په موخه، د خنډونو پاکولو، کیندنو، خاورې لېږدولو او د لښتیو جوړولو چارې روانې دي. دغه سړک، چې (۲۳۹۶) متره اوږدوالی او (۳۳) متره سور لري، د یو معیاري سړک د ټولو جزئیاتو په ګډون به د نږدې یوه کال په موده کې په معیاري ډول جوړ شي. د ګلباغ سړک د اقتصادي دهلیز په توګه، چې د کابل لویدیځ زون له سویل سره نښلوي، د ټرافیکي زیربناوو د پراختیا په برخه کې هم ځانګړی اهمیت لري. یاد سړک چې د دارالامان له ماڼۍ څخه پیل او د کابل-لوګر سړک سره نښلول کیږي، څلورو برخې لري، چې لومړۍ او دویمه برخه یې تر کار لاندې ده او نورې دوه برخې یې د تدارکاتو په پړاونو کې دي، او د جوړولو عملي چارې به یې په نږدې راتلونکي کې پیل شي. د ګلباغ سړک په جوړولو سره به ټرافیکي ستونزې هوارې او د کابل ښار اقتصادي ودې به زمینه برابره شي