د څوارلسمې ناحیې اړوند د قرغې بند له سیمې څخه تر تاق ظفر پورې د پغمان پخواني سړک د جوړولو او پراختیا چارې د کابل ښاروالۍ د کار، ساتنې او مراقبت ریاست له خوا په چټکۍ سره روانې دي او هڅه کېږي چې، دغه پروژه د روان کال په بهیر کې بشپړه او ګټې اخیستنې ته وسپارل شي. د قرغې له بند څخه د پغمان تر طاق ظفر پورې سړک (۹۱۵۳) متره اوږدوالی او (۷) متره سور لري، چې په جوړیدو سره به یې د څوارلسمې ناحیې د اوسیدونکو او د پغمان تفریحي سیمې ته د تلونکو هیوادوالو لپاره ګڼې آسانتیاوې رامنځته شي. د سړک جوړونې دا پروژه د کابل ښار د ترافیکي او ترانسپورتي زیربناوو د وضعیت د ښه والي په برخه کې مهم رول لري.