د کابل ښاروالۍ له خوا او د ملګرو ملتونو د پروژوي خدمتونو د دفتر په مرسته، د شپږمې ناحیې د ۲۵م ګذر اړوند په قلعه بهادرخان سیمه کې د شپږو کوڅو کانکرېټ چارې روانې دي او ټاکل شوې ده تر راتلونکې یوې اونۍ پورې بشپړې او ګټې اخیستنې ته وسپارل شي. د شپږمې ناحیې رئیس مولوي عبدالخالق بدر په دې تړاو وویل: دغه کوڅې چې په ټولیزه توګه (۱۳۲۰) متره اوږدوالی او (۴.۵) متره سور لري، په بشپړېدو سره به یې د سیمې د اوسېدونکو ترانسپورتي او چاپېریالي ستونزې هوارې شي. نوموړي زیاته کړه چې له ښاري آسانتیاوو څخه په محرومو سیمو کې به ښاریانو ته د سالم ښاري چاپېریال او کاري بوختیاوې رامنځته کولو په موخه، ورته نورې پروژې هم طرحه او پلې شي