د اوومې ناحیې اړوند د علاءالدین له درې لارې څخه تر تخنیکم پورې د نوي نښلوونکي سړک د جوړولو چارې روانې دي او هڅه کېږي تر څو هرڅه ژر قیرکولو ته چمتو شي. دغه سړک چې، (۱۷۶۷) متره اوږدوالی او (۳۰) متره سور لري، د دارالامان سړک له چهلستون سیمې سره نښلوي او د یوه معیاري سړک د ټولو برخو په ګډون به د روان کال په بهیر کې په اساسي توګه جوړ شي. د کابل ښاروالۍ د ښاري زیربناوو د رئیس انجنیر فایق احمد "تسل" په وینا، د دې سړک په اوږدو کې د کابل سیند د پاسه د موټرو تګ راتګ په موخه، د دوو پلونو ډیزاین چې هر یو یې، (۲۷.۸۵) متره اوږدوالی او (۹.۲) متره سور لري، بشپړ شوی او د جوړولو عملي چارې به یې ډېر ژر پیل شي. د کابل ښاروالۍ د برنامو او پروژو د تنظیم ریاست انجنیران د دې پروژې د کار د ښه کیفیت او په ټاکلي وخت یې د پلي کېدو په موخه، فني او تخنیکي څارنې ترسره کوي. له علاء الدین درې لارې څخه تر تخنیکم سیمې پورې سړک د ترانسپورتي ستونزو د حل او د سیمو د اقتصادي ودې په برخه کې ځانګړی اهمیت لري