د کابل ښاروالۍ له خوا د ملګرو ملتونو د پروژوي خدمتونو د دفتر په مرسته، د یو ویشتمې ناحیې د ۳م ګذر اړوند د څرخه پله په مسلم آباد سیمه کې د یوه فرعي سړک د جوړولو چارې روانې دي. د کابل ښاروالۍ د برنامو او پروژو د تنظیم ریاست د معلوماتو له مخې؛ دغه سړک چې، (۶۴۰) متره اوږدوالی او (۶ ) متره سور لري، د لښتیو په ګډون یې تر اوسه ۴۰ سلنه چارې مخته تللې دي او ټاکل شوې ده تر راتلونکو (۳) میاشتو پورې بشپړې او ورسره جوخت به د سیمې د اوسېدونکو ترانسپورتي او چاپېریالي ستونزې هوارې شي. پاتې دې نه وي چې، په دې پروژه کې یو شمېر هېوادوالو ته د کار زمینه هم برابره شوې ده.