د شپږمې ناحیې اړوند د علاءالدین درې لارې او چهار قلعه چهاردهي سیمو ترمنځ د ۸۶ میلیونه افغانیو په ارزښت د نوي نښلوونکي سړک د جوړولو لومړنۍ چارې د کابل ښاروالۍ د ودانیزو چارو د مرستیال انجنیر عامر زمرک یاسر په شتون کې پیل شوې. ښاغلي یاسر د دې پروژې د پرانیستې په مراسمو کې وویل: دا سړک ۱۹۰۲ متره اوږدوالی او ۲۰ متره سور لري چې، د یوه معیاري سړک د ټولو جزئیاتو په ګډون ډیزاین شوی دی او چارې به یې د شپږو کاري میاشتو په موده کې بشپړې شي. نوموړي زیاته کړه: د دې سړک په جوړېدو سره به نه یوازې د تګ راتګ په برخه کې د سیمې اوسېدونکو ته آسانتیاوې رامنځته شي بلکې، د ورڅېرمه سیمو اقتصادي ودې ته به زمینه برابره شي. د یادونې وړ ده چې، د دې پروژې په اوږدو کې ۲۰۰ ملکیتونه تر استملاک لاندې دي او د قانون له مخې به یې مالکانو ته بدیل حقونه ورکړل شي