د بنسټیزو برخو تر جوړېدو وروسته، د بادام باغ سړک له پاتې برخو څخه د یوې بلې برخې قیر چارې چې، (۷۸۰) متره اوږدوالی لري، پیل شوې. دغه سړک چې، د سرای شمالي له څلورلارې څخه د نادریې لېسې تر څلورلارې پورې (۳۲۸۹) متره اوږدوالی، (۲۰) او (۳۰) متره سور لري، څه موده وړاندې یې د (۱۵۰۰) مترو په اوږدوالي برخه قیر شوې ده. د دې ترڅنګ، د یاد سړک د پاتې بنسټیزو برخو پر جوړولو کار روان دی ترڅو هغه هم قیر کولو ته چمتو شي. د کابل ښاروالۍ د برنامو او پروژو د تنظیم ریاست د معلوماتو له مخې، د یاد سړک د جوړولو په پروژه کې چې، د ښاري معیارونو مطابق جوړېږي، د لښتيو، پلیو لارو، ګلدانونو جوړول، د څراغونو نصبول، په سړک د کرښو اچول او نور جزئیات هم شامل دي. کابل ښاروالۍ هڅه کوي څو دغه پروژه د روان کال په بهیر کې بشپړه او ګټې اخیستنې ته وسپارل شي