د کابل ښاروالۍ د کار، ساتنې او مراقبت ریاست له خوا د بره کي په څلورلارې کې تر ځمکې لاندې سړک د جوړولو چارې (۴۰) سلنه مخته تللې دي. د کار، ساتنې او مراقبت ریاست د مسئولانو په وینا؛ د ترافیک څلورلارې له لوري د یاد سړک د پایو( ستنو) د جوړولو او د سیمې د کیندنو چارې بشپړې شوې دي او د نادریې لېسې د څلورلارې له لوري یې د پایو(ستنو) د جوړولو کار په چټکۍ سره روان دی. دغه لویه پروژه دوه برخې لري چې، لومړۍ برخه یې د نادریې لېسې او ترافیک څلورلارو ترمنځ، د (۴۷۰) مترو په اوږدوالي، (۲۱) مترو په سور او (۵.۵ ) مترو په ژوروالي سره ترځمکې لاندې سړک جوړول دي چې، ټاکل شوې ده د روان کال په بهیر کې یې د جوړولو چارې بشپړې شي. همدا راز د دې پروژې دویمه برخه له دهن باغ څخه د پروان دو سیمې په لور د (۷۰۰) مترو په اوږدوالي، (۲۱) مترو په سور او د (۵.۵) مترو په لوړوالي سره د هوايي پله جوړول دي چې، د جوړولو چارې به یې په راتلونکي کال کې پیل شي. دغه پروژه په بره کې څلورلارې او ورڅېرمه سیمو کې د ترافیکي ستونزو د حل او د ګڼه ګوڼې د کمښت په برخه کې مهم رول لري