د کابل ښاروالۍ له خوا او د ملګرو ملتونو د پروژوي خدمتونو د دفتر په مرسته، د نهمې ناحیې د ۲۱م ګذر اړوند د څلورم مکروریان په سیمه کې د یوه فرعي سړک د جوړولو چارې پیل شوې. دغه سړک چې، (۶۹۵) متره اوږدوالی او (۶) متره سور لري، د لښتیو او د سړک دواړو خواوو ته له (۲) څخه تر (۳) مترو په سور د پلیو لارو جوړولو په ګډون به د څلورو میاشتو په موده کې په معیاري توګه جوړ شي. د نهمې ناحیې مرستیال مولوي عبدالغفور غفوري په دې اړه وویل: د څلورم مکروریان اوسېدونکي پخوا د دې سړک د خرابوالي له امله له ګڼو ستونزو سره مخ وو چې، د ناحیې په وړاندیز او د کابل ښاروالۍ د مشرتابه په لارښونه یې د جوړولو عملي چارې پیل شوې چې، په بشپړېدو سره به یې د سیمې د اوسېدونکو ترانسپورتي او ښاري ستونزې هوارې شي. پاتې دې نه وي چې، په دې پروژه کې به یو شمېر هېوادوالو ته د کار زمینه هم برابره شي